مالي او اداري چارو معین د تفتیش لوی ریاست له مسؤلینو سره وکتل
د کار او ټولنیزو چارو وزارت د مالي او اداري چارو معین الحاج مولوي دینمحمد حقبین د خپل کار په دفتر کې د تفتیش ریاست له مسؤلینو سره وکتل.
په پیل کې د تفتیش لوی ریاست استازو د خپلو فعالیتونو، لاسته راوړنو، کاري پلانونو او نظارت په تړاو، چې له ټولو امارتي او غیر امارتي ادارو په خاص ډول د کار او ټولنیزو چارو وزارت د مرکزي او ولایتي ریاستونو څخه یې ترسره کړي؛ خبرې اترې وکړې او د تفتیش او نظارت په برخه کې یې د کار او ټولنیزو چارو وزارت له پوره همکاریو څخه ستاینه او مننه وکړه.
ورپسې د کار او ټولنیزو چارو وزارت د مالي او اداري چارو معین الحاج مولوي دین محمد حقبین په خپلو خبرو کې د تفتیش لوی ریاست له فعالیتونو او لاستهراوړنو د ستاینې سربېره وویل: د تل لپاره باید د حق، عدالت او شفافیت پیروي وکړو او د امارتي او غیر امارتي ادارو کارمندانو ته خپلې نیمګړتیاوې ورپه ګوته کړو ترڅو ننګونې یې له منځه لاړې شي او په چارو او د خدماتو په وړاندې کولو کې غورهوالی راشي.
همداراز نوموړي په خپلو خبرو کې د یاد ریاست له مسؤلینو څخه د لا زیاتو هلو ځلو او همکاریو غوښتنه وکړه، ترڅو په کارونو کې د ښه والي او چټکتیا تر څنګ؛ روڼتیا، اعتماد او اخلاص هم رامنځته شي.
