د آریانا طبي کمپلکس سره هوکړهلیک لاسلیک شو
په حمایوي مرکزونو او روزنتونونو کې د یتیم او بېسرپرسته ماشومانو د غوره وقايې، تشخیص او درملنې په منظور؛ د کار او ټولنیزو چارو وزارت؛ له آریایانا طبي کمپلکس سره هوکړهلیک لاسلیک کړ.
په هغه غونډه کې چې په همدې موخه جوړه شوې وه د کار او ټولنیزو چارو وزارت؛ د ټولنیزو چارو معین مولوي عبیدالله امینزاده په خپلو خبرو کې وویل: د روغتیا په شمول د ټولنې محرومو او زیانمنو اقشارو هر ډول ستونزو او ننګونو ته رسېدنه او د هغوی لاسنیوی؛ نه یوازې د افغانستان اسلامي امارت بلکه د ټولو وګړو او بنسټونو له اساسي شرعي او انساني دندو څخه شمېرل کیږي؛ چې د آریانا طبي کمپلکس له دغه انساني احساس څخه مننه کوو او هغه ستایو.
مولوي امینزاده زیاته کړه، خوښ یو؛ چې د هوکړهلیک له لاسلیک وروسته په کابل او ولایاتو کې د زیانمنو اقشارو په مرکزونو او روزنتونونو کې شاملو یتیمو او بېسرپرسته ماشوماتو ته په ځانګړي تخفیف سره معیاري صحي خدمات وړاندې کیږي.
ورپسې د آریانا طبي کمپلکس روغتون سرطبیب ډاکتر خیبر صدیقي هم په خپلو خبرو کې وویل: پخوا مو هم دا ډول خدمات وړاندې کړي او اوس د خوښۍ ځای دی، چې له هوکړهلیک سره به هېواد تر ټولو زیانمن او مستحق قشر ته له دې وروسته په منظم او معیاري ډول روغتیايي خدمات وړاندې کیږي.
