د کار چارو معین د ساختماني شرکتونو د اتحادیې له رئیس سره وکتل
د کار او ټولنیزو چارو وزارت؛ د کار چارو معین الحاج مولوي محمد زاهد احمدزي د خپل کار په دفتر کې په افغانستان کې د ساختماني شرکتونو د اتحادیې له رئیس حمیدالله حبیبي او استازي سره وکتل.
په پیل کې د ساختماني شرکتونو د اتحادیې رئیس حمیدالله حبیبي په خبرو کې د خپلو فعالیتونو، لاسته راوړنو، له امارتي ادارو سره د همکارۍ او همغږۍ په رامنځته کولو، د کار په کیفیت، د متخصصو کسانو او د فني او حرفوي زدهکړو فارغ شویو ځوانانو ته په بېلابېلو برخو کې د ظرفیت لوړونې او کاري زمینو د برابرولو په موخه معلومات شریک کړل.
ورپسې د کار چارو معین الحاج مولوي محمد زاهد احمدزي په خپلو خبرو کې د اتحادېې د هلو ځلو ستاینه او زیاته یې کړه: چې د افغانستان اسلاميامارت په ځانګړي ډول د کار او ټولنیزو چارو وزارت هڅه کوي، ترڅو په ټولنه کې ماهر او مسلکي کارګران وروزي، د کار بازار اړتیاوې تشخیص کړي، د ودانیزو چارو په برخو کې نړیوالو معیارونو ته په کتو کورنیو او بهرنیو پانګهوالو، انجینرانو او مسلکي کارګرانو ته د کار او فعالیت زمینه برابره کړي، د انساني کرامت خوندیتوب، ځوانانو ته په مختلفو برخو کې د کارموندنې، د کاري زمېنې پراختیا، د فني او حرفوي زدهکړو برنامو په لاره اچولو او د امکان په صورت کې یې د اشتغال لپاره د ماهرو کاریګرو په توګه بهرنیو کارګرمنونکو هېوادونو ته ولېږي.
همداراز مولوي احمدزي زیاته کړه، دا زمونږ دنده ده، ترڅو په ټولنه کې د بېکارۍ د کچې په راټیټولو، د غوره او معیاري کار ترویج، د ټولګټو پروژو د تطبیق د څرنګوالي او ولسونو ته د آسانتیاوو د برابرولو په برخو کې خپلې هڅې جاري وساتو او ټولنه د باثباته راتلونکي لور ته رهبري کړو.
