د کار چارو معين د صنعتکارانو له استازو سره وکتل
په رسمي چارو کې د آسانتیاوو په موخه د عالیقدر امیرالمؤمنین حفظهالله د حکم، په اساس د کار چارو معين الحاج مولوي محمد زاهد احمدزي د خپل کار په دفتر کې د خصوصي سکتور اړوند د صنعتکارانو له استازو، د فابریکو او شرکتونو له مسئولینو سره دوهیمه ناسته ترسره کړه.
په دې ناسته کې د دواړو اړخونو له لوري د صنعت او سوداګرۍ په برخه کې د شته ستونزو او خنډونو د حل، د سوداګرو او صنعتکارانو ملاتړ، د کار بازار اړتیاوو، په هېواد کې پانګونې ته د نورو فرصتونو په برابرولو، په استخدام کې دې د بهرنیو پرځای داخلي وګړو ته لومړيتوب ورکولو، د کارګر د حقوقو خوندیتوب، د کار مفتشینو سره د پوره همکارۍ او همغږۍ، د کار جواز په ترلاسه کولو کې د نورو اسانتیاوو رامنځته کولو، صنعتي او تولیدي فعالیتونو پراختیا په برخه کې او په ټوله کې له خصوصي سکتور سره د غوره اړیکو په اړه هر اړخیز بحث وشو.
مولوي احمدزي په خپلو خبرو کې زیاته کړه، د ا.ا.ا د قوانینو او پالیسیو په نظر کې نیولو سره د کار او ټولنیزو چارو وزارت چمتو دی له خصوصي سکتور سره د همغږۍ، همکارۍ او ګډو برنامو له لارې د بېکارۍ د کچې په راټیټولو او ځوانانو ته د کارموندنې په برخه کې خپلې هلې ځلې ګړندۍ کړي.
همداراز مولوي احمدزي اړوند ریاستونو ته سپارښتنه وکړه، ترڅو د صنعتکارانو، شرکتونو او فابریکو مسئولینو ستونزو ته په ګډه همغږۍ او همکارۍ سره رسېدنه وشي او په چارو کې ورته اسانتیاوې برابرې شي.
په پای کې د صنعت او سوداګرۍ سکتور استازو هم د کار او ټولنیزو چارو وزارت د همکاریو او دوامدار ملاتړ قدرداني وکړه او ژمنه یې وکړه، چې د کارموندنې او بشري ځواک د اشتغال په برخه کې به له یاد وزارت سره په همغږۍ خپلو فعالیتونو ته پراختیا ورکړي.
