د کار چارو معين د صنعتکارانو له استازو سره وکتل
د کار او ټولنیزو چارو وزارت؛ د کار چارو معين الحاج مولوي محمد زاهد احمدزي د خپل کار په دفتر کې د خصوصي سکتور اړوند د صنعتکارانو له استازو، د فابریکو او شرکتونو له مسئولینو سره وکتل.
په دې ناسته کې د دواړو اړخونو له لوري هېوادوالو ته په بېلا بېلو برخو کې د لا دیرو کاري فرصتونو برابرولو، د صنعت او سوداګرۍ په برخه کې د شته ستونزو او خنډونو د حل، د سوداګرو او صنعتکارانو ملاتړ، په هېواد کې پانګهاچونې ته د نورو فرصتونو په برابرولو، داخلي تولیداتو ته د لومړيتوب په ورکولو، په استخدام کې دي د بهرنیو وګړو پرځای داخلي وګړو ته لومړيتوب ورکولو، د کارګر د حقوقو تأمین، د آسانتیاوو برابرولو او په ټوله کې له خصوصي سکتور سره د غوره اړیکو په اړه هر اړخیز بحث وشو.
مولوي احمدزي په خپلو خبرو کې زیاته کړه، د ا.ا.ا د قوانینو او پالیسو په نظر کې نیولو سره د کار او ټولنیزو چارو وزارت چمتو دی له خصوصي سکتور سره د همغږۍ، همکارۍ او ګډو برنامو له لارې د بېکارۍ د کچې په راټیټولو او ځوانانو ته د کارموندنې په برخه کې خپلې هلې ځلې ګړندۍ کړي.
په پای کې د صنعت او سوداګرۍ سکتور استازو هم د کار او ټولنیزو چارو وزارت د همکاریو قدرداني وکړه او ژمنه یې وکړه، چې د کارموندنې او بشري ځواک د اشتغال په برخه کې به له یاد وزارت سره په همغږۍ خپلو فعالیتونو ته پراختیا ورکړي.
