ارګون کې له ٩٠ کورنیو سره د نقدي پیسو او خیاطۍ حرفې د وسایلو مرسته وشوه
د پکتیکا ولایت د کار او ټولنیزو چارو ریاست په هڅو او د KRO همکارې مؤسسې په مالي ملاتړ د ارګون ولسوالۍ د ٩٠ اړمنو او له اعتیاد څخه رغېدلو کسانو له کورنیو سره د ٥٩١٣٠٠ افغانیو په ارزښت د نقدي مرستو سربېره پر دوی د خیاطۍ حرفې د کار وسایل هم ووېشل شول.
د دې مرستې د وېش پرمهال د پکتیکا ولایت د کار او ټولنیزو چارو رئیس مولوي اسلام حسین الهام په خپلو خبرو کې وویل: د کار او ټولنیزو چارو وزارت تل په دې هڅه کې دې، چې د اړمنو او له خطر سره مخ هېوادوالو لاسنیوی او مرسته وکړي، دوی ته د کار بازار د اړتیاوو مطابق د فني او حرفوي زده کړو زمینه برابره کړي، ترڅو تر فراغت وروسته یې ټولنې ته د وخت د غوښتنو سره سم ماهر کارګر روزلي وي.
مولوي اسلام حسین الهام همدارنګه له نورو ملي او نړیوالو مؤسساتو وغوښتل، چې بېکاره او اړمنو هېوادوالو ته د زده کړو د زمینې برابرولو او دوی ته پر وخت د مرستو رسولو په برخه کې د دې وزارت سره په همغږۍ خپلې پروژې تطبیق کړي.
