بامیانو کې ۱۰۰ تنو یتیمو ماشومانو ته روزنتون او ۱۵۰ تنو ځوانانو ته د فني او حرفوي زدهکړو مرکز پرانېستل شو
د کار او ټولنیزو چارو وزارت معین الحاج مولوي محمد زاهد د یوه پلاوي په مشرۍ، بامیانو ولایت ته په خپل رسمي سفر کې د دې ولایت له یتیمو او بېسرپرستو ماشومانو څخه د ملاتړ په منظور؛ یو باب روزنتون او ځوانانو ته د کارموندنې په موخه د فني او حرفوي زدهکړو مرکز پرانېست.
په هغو مراسمو کې چې په همدې موخه جوړ شوي وو؛ د ولایتي ادارې ځینو رئیسانو، علمای کرامو او قومي مشرانو حضور درلود؛ د دې ولایت د کار او ټولنیزو چارو رئیس قاري زینالله مسرور مېلمنو ته د ښه راغلاست ویلو سربېره؛ د دې ریاست د فعالیتونو په اړه لنډ معلومات شریک او د روزنتون او فني او حرفوي زدهکړو د مرکز د پرانېستلو له امله یې د کار او ټولنیزو چارو وزارت د رهبرۍ له پاملرنې مننه وکړه او هم یې ځینې وړاندیزونه شریک کړل.
ورپسې د کار چارو معین خپله وینا کې وویل: د خوښۍ ځای دی، چې د ۱۰۰ تنو یتیمو او بېسرپرستو ماشومانو د کفالت او هم ۱۵۰ تنو ځوانانو ته د پنځو حرفو د تدریس په منظور د فني او حرفوي زدهکړو مرکز پرانیزو، چې زیانمنو ماشومانو ته په روزنتون کې د ژوندانه لازم سهولتونه برابر شوي او ځوانان به هم وکولای شي، چې د زدهکړو د ترلاسه کولو وروسته د ماهرو کاریګرو په توګه د فراغت سندونه ترلاسه او د کار بازار ته عرضه شي، چې ټول لګښت به یې د وزارت له بودیجې ترسره او هم به د زدهکړو بهیر د مجربو استادانو لخوا پرمخ یوړل شي. مولوي محمد زاهد د خپلو خبرو په دوام وویل، چې د کار او ټولنیزو چارو وزارت د هېواد په کچه خپل اړوند د فني او حرفوي زدهکړو مراکز او روزنتونونه فعال کړي، چې دمګړۍ ګڼ شمېر ماشومان او ځوانان یادو برخو کې په زدهکړو بوخت دي.
مولوي محمد زاهد له محلي ادارې سره د بامیانو ولسونو همکاري وستایله او له هغوی یې وغوښتل، چې دا همکاري لا پراخه او د چارو د ښه پرمختګ او د خدماتو د وړاندې کولو په لارو کې د بهبود په موخه؛ مختلفو برخو کې له خپلو مسؤلینو سره نظریات او سلا مشورې شرېکې کړي.
په پای کې یې ډاډ ورکړ، چې هڅه به کوي، ترڅو د دې ولایت د کار او ټولنیزو چارو ریاست له لوري مطرح شویو وړاندیزونو ته د امکان تربریده رسېدنه وکړي.
د یادولو ده چې د بشري قواوو عمومي رئیس مولوي حسین احمد مدني او د مطبوعاتو رئیس سمیعالله ابراهیمي هم په دې سفر کې د کار چارو د معین ملتیا کوي.
