بهر ته د افغان کاریګرو د غیرقانوني اعزام د مخنیوي لپاره درېیمه ناسته ترسره شوه
بهر ته د افغان کاریګرو د غیر قانوني اعزام د مخنیوي لپاره درېیمه ناسته ترسره شوه
د کار او ټولنیزو چارو وزارت؛ د کار چارو معین الحاج مولوي محمد زاهد احمدزي په مشرۍ بهر ته دافغان کارګرانو د غیر قانوني اعزام د مخنیوي لپاره د کورنیو چارو، بهرنیو چارو، اطلاعات او کلتور، حج او اوقافو، عامې روغتیا او عدلې وزارتونو او د احصائې او معلوماتو ملي ادارې د استازو په ګډون درېیمه تخنیکي ناسته ترسره شوه.
په پیل کې د یادو امارتي ادارو استازو په هېواد کې د ننه او له هېواد څخه بهر افغان کاریګرو او ځوانانو د ستونزو، ننګونو، هلته شته فرصتونو او د هغوی د حقوقو د تأمین په اړه د معلوماتو د وړاندې کولو تر څنګ؛ د افغان کارګرانو د غیر قانوني اعزام د مخنیوي پر لارو چارو، د خپلو اړوندو مسؤلیتونو او هلته شته ستونزو ته د رسېدنې او حل پر څرنګوالي بحث وکړ.
ورپسې د کار چارو معین الحاج مولوي محمد زاهد احمدزي په خپلو خبرو کې په دې برخه کې د یادو امارتي وزارتونو او ادارو له استازو د هڅو د ستاینې سربېره په خپلو خبرو کې د افغان کارګرو د غیر قانوني اعزام د مخنیوي، د بشري قاچاق پر وړاندې مبارزې، د کارګرو د حقوقو، د هغوی د عزت او امنیت خونديتوب، د اړونده ادارو تر منځ منظمې همغږۍ او همکارۍ او د قانوني کارموندنې مصئون بهیر د رامنځته کولو څخه د اطمینان او د قانوني میکانیزم د جوړولو په اړه هر اړخیزې خبرې وکړي.
مولوي احمدزي د خپلو خبرو په دوام کې له اړوندو امارتي ادارو څخه غوښتنه وکړه؛ چې د کارموندنې له خصوصي شرکتونو سره په ګډه همکارۍ او همغږۍ د غیر قانوني انساني قاچاق په مخنیوي کې اغیزمن او کوټلي ګامونه واخلي.
