ننګرهار کې د فني او حرفوي ۷۲۰ تنو زدهکوونکو ته کاري او روزنیز وسايل ووېشل شول
د فن او حرفې په برخه کې د غوره او مسلکي زدهکړو؛ همدارنګه د میکانیزه مالدارۍ؛ نوېې ټکنالوژۍ او د کار بازار له موجوده اړتیاوو سره سم د ننګرهار ولايت د کار او ټولنیزو چارو ریاست په هڅو د هغه ولایت په نهو (غنيخیلو، مومندرې، بټيکوټ، کامې، بهسود، سرهرود،خوګیاڼو، شيرزاد او حصارک) ولسوالیو کې د فني او حرفوي زدهکړو ۷۲۰ تنو زدهکوونکو ته د خیاطۍ او د چرګانو دروزنې په حرفو کې کاري وسایل ووېشل شول ترڅو د پاتې زده کړو په جريان کې د عملي کار لپاره ور څخه ګټه واخلي.
په همدې مناسبت جوړه شوې غونډه کې د ننګرهار ولایت د کار او ټولنیزو چارو رئیس مولوي فریدالله حقاني سربېره د پورته ذکرشویو ولسوالیو ولسوالان، دعلماو شورا غړي او رئیس او یوشمېر نورو مسؤلینو حضور درلود.
دکار او ټولنیزو چارو رئیس مولوي فریدالله حقاني په خپلو خبرو کې وویل: زدهکوونکې دې د زدهکړو په بهیر کې له یادو وسایلو څخه سالمه استفاده او ساتنه وکړي.
د ننګرهار ولایت ولسونو او علماوو د یادو روزنیزو او کاري توکو له ویش څخه خوښې څرګنده کړه او له مسؤلینو څخه یې وغوښتل ترڅو په راتلونکې کې د دا ډول پروژو تطبیق ته لا زیاته زمینه برابره کړي.
د یادولو وړ ده چې د فن او حرفې په برخه کې د غوره او مسلکي کارګرانو د روزنې لپاره یاد کاري او روزنیز توکې د idwso موسسې په مالي ملاټر فني او حرفوي زدهکوونکو توزیع شول.
