په حکومتوالۍ کې د آسانتیاوو رامنځته کولو په موخه د اداراتو ترمنځ هوکړه لیکونه لاسلیک شول
د کار او ټولنیزو چارو وزارت، د کډوالو او راستنیدونکو چارو وزارت، و لوړو زده کړو وزارت، د تخنیکي او مسلکي زده کړو ادارې او د اداري اصلاحاتو او ملکي خدمتونو ادارې ترمنځ په کاري چارو د ساده کولو او په فعالیتونو کې د آسانتیاوو رامنځته کولو په موخه د همکارۍ هوکړه لیکونه لاسلیک شول.
په هغه غونډه کې چې په همدې موخه د حکومت په رسنیو مرکز کې جوړه شوې وه د کار او ټولنیزو چارو وزارت مالي او اداري مرستیال مولوي دین محمد حقبین وویل چې د اسلامي امارت اصلي موخه حکومت کول نه بلکې ولس ته خدمت کول دی او دې یادو هوکړه لیکونه اصلی موخه د خدمتونو په وړاندې کولو کې د آسانتیاوو رامنځته کول دی.
مولوي حقبین وویل: هڅه کوو په خپلو فعالیتونه کې ولس ته لمړیتوب ورکړو، ولس هیر نه کړو، له ملت سره په خپلو ژمنو باندې وفا وکړو، کار اهل کار ته وسپارو، خپل خدمات له اخلاص او صداقت سره ولس ته وړاندې کړو او نوره کوښښ هم کوو ترڅو په یادو خدماتو کې نور سهولتونه هم رامنځته شي.
وروسته د چارو ادارې لوی رییس مولوي احمدجان احمدي وویل: د نړۍ په اکثره هیوادونو کې د حکومتوالۍ په چارو کې د اسانتیاوو رامنځته کولو لپاره مستقلې ادارې موجودې دي چې اصلي موخه یې د بااستعداده بشري سرچینو روزنه او جلب کول، د ظرفیتونو لوړول، مډرنه حکومتوالۍ رامنځته کول، له استخدام څخه څارنه، د ملکي مامورینو شکایتونو اوریدل او په اداره کې د اصلاحاتو منځته راوړل دي.
مولوي احمدي زیاته کړه: د پروسو ساده کول خلکو ته آسانې، روڼتیا، وخت سپما او چټکتیا منځته راوړي، لګښتونه راکموي، په مسوولیتونو او صلاحیتونو کې وضاحت پیدا کیږي او د ملت او دولت ترمنځ واټن راکموي.
د چارو ادارې لوی رییس مولوي احمدجان احمدي وویل: په ټول حکومت کې ۳۶۷ ډوله جوازونه په ګوته شوې چې ډیرۍ ېې د صنعت او تجارت وزارت پورې اړه لري چې هم په یاد وزارت او هم نورو وزارتونو او ادارو کې ډیره آسانې رامنځته شوې، د مثال په توګه د کار او ټولنیزو چارو په وزارت کې د روزنتون یو معلم په تبدیلۍ کې پخوا ۲۳ قدمونو او ۴۵ ورځو ته اړتیا وه چې اوس یاده موده ۱۲ قدمونو او ۲۴ورځو ته راکمه شوې ده او همدا شان په روزنتونونو کې د بې سرپرسته ماشومانو جلب پروسه ۴۰ورځو څخه ۴ ورځو ته راکښته شوې ده.
وروسته د کډوالو او راستنیدونکو چارو وزیر مولوي خلیل الرحمان حقاني وویل چې د ادارو په کار او فعالیت او ولس، کډوالو او کورنیو بې ځایه شویو ته د کمکونو په توزیع کې تأخیر د منلو وړ نه ده او په یاده برخه کې زیاتې اسانتیاوې راغلی دي.
په دې غونډه کې د لوړو زده کړو وزارت وزیر مولوي عبدالباقي حقاني وویل چې د اشغال له خاتمې وروسته د بیارغونې په مرحله کې د کاري پروسو آسانتیا یو اصل دی، مولوي حقاني په قوانینو کې پیچلتیا د ساده کولو پروړاندې لوی خنډ یاد کړ او زیاته یې کړه چې اوس د لوړو زده کړو په وزارت کې د استادانو په جلب او استخدام لوی سهولتونه رامنځته شوې دي.
د ملکي خدماتو او اصلاحاتو ادارې رییس مولوي عبدالحنان عارف الله؛ وویل: غواړو چې نن یوولس هوکړه لیکونه لاسلیک کوو چې ۷ د کډوالو او راستنیدونکی وزارت او ۴ نور یې د کار او ټولنیزو چارو وزارت پوری اړه لري او له یادو هوکړه لیکونو له لاسلیک څخه اصلي موخه په کاري چارو کې له خڼډ او ځند او که کاغذپرانۍ څخه مخنیوی دی.
په غونډه کې د مسلکي او تخنیکي ادارې رییس مولوي غلام حیدر شهامت وویل: په نړۍ کې له هر تغییر سره باید ځان عیار کړو او مغلقي او پیچلی کاري پروسې باید آسانه کړو؛ مولوي شهامت وویل چې زموږ په اداره کې به د پروسو اسانتیا رامنځته کول په رښتینې توګه پیل شي.
د ویلو ده چې د یادو هوکړه لیکونو په لاسلیک سره به په پورتینو حکومتي ادارو کې د خدماتو په وړاندې کولو او د جوازونو په توزیع کې به پوره سهولتونه رامنځته شي.
