پکتیکا کې ۱۰۰ تنو یتیمو او بېسرپرستو ماشومانو ته د روزنتون پرانېستل شو
د کار او ټولنیزو چارو وزارت معین الحاج مولوي محمد زاهد احمدزي پکتیکا ولایت ته د خپل رسمي سفر په ترڅ کې د دې ولایت د یتیمو او بېسرپرستو ماشومانو څخه د ملاتړ په منظور، د یوه باب روزنتون پرانېسته وکړه.
په همدې مناسبت جوړه شوې غونډه کې د کار چارو معین خپلو خبرو کې وویل: له یتیمو او بېسرپرستو ماشومانو څخه د کفالت او دوی ته د ژوندانه د سهولتونو د اېجاد په موخه د کار او ټولنیزو چارو وزارت په ټول هېواد کې خپل اړونده روزنتونونه فعال کړي او په کې یې تر ۶ زرو څخه زیاتو ماشومانو ته د اعاشې، اباتې، تعلیم، تربیې او د روغتیایي خدماتو زمینه برابره کړېده، چې په همدې لړۍ کې د پکتیکا ولایت روزنتون پرانېسته مو هم ترسره او دلته به ۱۰۰ تنو ماشومانو ته اړین خدمات وړاندې شي.
مولوي محمد زاهد احمدزي یتیمانو ته په خطاب کې وویل: تاسې د تنهایۍ او محرومۍ احساس مه کوئ، ځکه د افغانستان اسلامي امارت هر مسؤل په ځانګړې توګه د کار او ټولنیزو چارو وزارت به ستاسو ستونزو ته رسېدنه کوي، لاسنیوي او ملاتړ به مو کوي او ستاسو له احوال څخه به ځان خبروي. په همدې ترتیب یې ټینګار وکړ، چې د روزنتون استادان یې د ماشومانو د سالمې روزنې په برخه کې خپل مسؤلیت په سمه توګه ترسره کړي.
