د ټولنیزو چارو معین د عامې روغتیا له سرپرست وزیر سره وکتل
![E](/sites/default/files/2024-08/9a7b292e-a89a-4afe-bda9-b4a044c8fe80.jpeg)
د کار او ټولنیزو چارو وزارت د ټولنیزو چارو معین الحاج شیخ عبدالبر، چې د روزنتونونو رئیس مولوي محمد اصغر صفدري یې هم ملتیا کوله، د عامې روغتیا له سرپرست مولوي نور جلال جلالي سره وکتل.
کتنه الحاج شیخ عبدالبر په خپلو خبرو کې وویل: د کار او ټولنیزو چارو وزارت د نورو مسؤلیتونو ترڅنګ د مرکز په ګډون په ټولو ولایتونو کې په خپلو اړوندو روزنتونونو کې سلګونو تنو یتیمو او بې سرپرستو ماشومانو ته د ښوونې او روزنې ترڅنګ ورته د پالنې او ساتنې سهولتونه برابر کړي او له خپلې داخلي بودیجې یې تمویلوي.
الحاج شیخ عبدالبر همدارنګه څرګنده کړه: له اړمنو او بې سرپرستو ماشومانو سره مرسته او د دوی ملاتړ د کار او ټولنیزو چارو وزارت د مسؤلیتونو یوه برخه ده او د عامې روغتیا له مشرتابه یې وغوښتل، چې د دې وزارت د روزنتونونو یتیمو او بې سرپرستو ماشومانو ته د روغتیایي خدماتو د چمتو کولو په برخه کې له دې وزارت سره همکاري وکړي، ترڅو په ګډه یې د افغان ماشومانو وضعیت ته په خپل وخت رسېدنه کړې وي.
ورپسې د عامې روغتیا سرپرست وزیر مولوي نور جلال جلالي په روزنتونونو کې د روغتیایي خدماتو په پراخېدو ټینګار وکړ او ویې ویل: د افغان یتیمو او بې سرپرستو ماشومانو لپاره به په روغتیایي مرکزونو کې لا زیاتې اسانتیاوې رامنځته کړي.
نوموړي همدا راز ډاډ ورکړ، چې مرکزي او ولایتي مسؤولینو ته به سپارښتنې وکړي، ترڅو د روزنتونونو یتیمو او بې سرپرستو ماشومانو لپاره په خپلو روغتیایي خدماتو کې پراختیا راولي او دوی ته ځانګړې پاملرنه وکړي.