د ملکي خدمتونو هر مامور بايد مسؤليت منونکی او تل مراجعينو سره نېکه رويه و کړي.
دغه خبره د کار او ټولنيزو چارو وزارت سرپرست سيد انور سادات د اصلاحاتو او ملکي خدمتونو کميسيون له خوا، ادارو کې د فرهنګي تغير او ښه چلند دودولو اړوند پروګرام کې و کړه.
سيد انور سادات وويل: د کار او ټولنيزو چارو وزارت دغه اصل ته د ژمنتيا په پار، اولنۍ اداره ده، چې ياد پروګرام په کې د اصلاحاتو او ملکي خدمتونو کميسيون څخه وروسته پرانستل کيږي.
نوموړي زياته کړه، چې د ملکي خدمتونو مامور، هيوادوالو ته د ښو خدمتونو وړاندې کولو په موخه استخداميږي، نو لازمه ده، چې کارکوونکي تل هڅه و کړي، مراجعينو سره نېکه رويه او پر وخت کارونه تر سره کړي.
ښاغلي سادات وويل، چې موږ بايد هر وخت مسؤليت منونکي او هيوادوالو ته ځواب ويونکي اوسو.
په دې بحث کې د اصلاحاتو او ملکي خدمتونو کميسيون کميشنر ميوند رهياب وويل: د ادارې لپاره ښې کړنې او نوم ساتل يې د ادارې د ټولو کارکوونکو مشترک ارزښت دی او بايد ټول کارکوونکي د ادارو د ارزښت ساتلو په موخه مشترک کار او هڅه و کړي.
نوموړي وويل، چې د اصلاحاتو او ملکي خدمتونو کميسيون ژمن دی، څو د ياد پروګرام د ښه پلي کولو برخه کې لومړی د هيواد په سطحه ټولو ادارو کې عامه پوهاوی ترسره او ور پسې ادارو سره د دغه فرهنګ د منظم پلان جوړولو برخه کې همکاري و کړي.
د ويلو دی، چې دې پروګرام ته د علومو اکاډمۍ، د خصوصي سکتور او ميرمنو په استازيتوب د بحث لپاره هم مسؤلين را بلل شوي وو، چې د اړوندې موضوع په اړه د ګډونوالو او پنل غړو تر منځ ګټور بحث و شو.